اسبوع ..متعب ..مر بسرعه جدا ..بس بجد باشفق عليه ...لأن الاجازة فجأة بتتحول لحاجه كلها تعب ..سينما كتيير ..و سفر و مشى فى الشمس و بسرعه بسرعه عشان نفتكر عشان الايام الكويسه فى حياتنا قليله هااااااا ..قصدى قليل لما بنفتكرها

الاحد : اجازة منزليه ..الميه قاطعه فى شارع الهرم ..هه

الاتنين : سينما ..كباريه ..كان حلو بجد و حسيت ان فى مشاهد واقعيه جدا لدرجه انى صدقتها و حسيتها بجد ..ثم بعد الكباريه رحنا للدكتور ..ثم قابلنا ماجد ..و عزمنا على مكرونه من عند بابا عبده ثم دلخنا السينما (اوديون) حفلة الساعة 12 وواضح ان الراجل اللى بيشغل الافلام كان بينام ..اخر الليل بقى ..و خلاه كل الناس افتكرت انها هى اللى مسطوله ..لانه شغل فيلم اجنبى بدل الفيلم العربى و فضلنا متنحين و مش فاهمين و بعدين لما الافندم و ماجد و كام واحد كدا اتحركم ..اتكتشفنا ان السينما كلها كانت مستسلمه و هتتفرج على اى حاجه ..و ان مش احنا اللى غلطنا و دخلنا فيلم تانى ..هه ..حاله لا مبالاه غريبه ..و الفلم كان ..ظريف ..اكتوبرررر يا اسطى ؟؟

التلات :اكسييد ..استقلت بعد 3 اسابيع ..اول مرة اكتب استقاله هه ..و بعدين نزلنا سوق السيراميك بس كنا مقتولين ثم نزلنا وسط البلد و ماك كان زحمة طحن و على ما اتذكر اننا روحنا بدرى يومها

الاربع : موقف اسكندريه و الاورق اللى مش راضى يخلص ..المرة دى الموضف المختص كان غايب هه ..و اكلنا ..مشكلتى فى اسكندريه فى الاسامى ..مش عارفه اسامى حاجه ..بس اكلنا فى مكان ظريف ..شوربه و سلطه و رز و فطيرة شاورمه ..و بعدين شربنا قهوة و لاتيه فى البن البرازيلى ..و تناسق الوان فظيع فى الارضيه ..مع تى شيرتات البرازيل ..هه ..ثم رحنا سينما ..اللى برضه مش عارفه اسمها و رجعنا فجأة كدا 10 سنين لورا ..جو السينما كان اشبه فعلا بسينمات وسط البلد قبل التجديد و الناس كلهم كانوا برضوا اشبه بزباين سينمات وسط البلد قبل التجيد و شفنا موبايل اريكسون من اللى انقرضوا و صبحان من يحيى العظام و هى رميم ..الموبايل كان بيطلب و يستقبل !!هه ..اما الفيلم ..فكان بيستهبل و الاطفال مسؤليه ذويهم و الريس عمر حرب غير مسؤل عنهم ..و قد اعذر من انذر..خلصت السينما و فضل البحر و عزة و الغروب و مافيا اتفضل يا باشا ..و كراسى تكفى مشجعين الزمالك فى يوم ماتش الاهلى و الزمالك ( طبعا ما قلتش مشجعين الاهلى لان عددهم اكتر بكتير من الكراسى اللى كانت محطوطه هاا) و بعدين الموقف و اتوبيسات غرب الدلتا ..اسواء حاجه ممكن بنى ادم يركبها بجد ..الاتوبيس اتملى دخان فى نص السكه و نشف دمنا لاننا افتكرناه ولع ..و الحمد لله جات سليمه ووصلنا بالسلامه و توبه من دى النوبه يا غرب الدلتا

الخميس ..البرتقاله ..اورنج ..10 دقايق بالظبط ..الست ما رضيتش تاخد الورق ..ثم سيتى ستارز و اتحسرت على اللحاف ابو الف و مش عارفه كام ريال ..يا عم ما قلنا لك الف مرة ..شجع صناعة بلدك ..و محلات بلدك ..و سيتى ستارز بلدك ..لان بلدك طلعت ارخص ..حتى و هى بتسرقك ..تصدق بقى ؟؟؟ و بعدين اشتريت لبس و رحنا الفجاله و سيراميك سيراميك و محل مش فاكرة اسمه ..شوربه و فته و لحمة راس ..فظيعه ..قلبت بطننا احنا الاتنين ....بعدين نزلنا غالبا على وسط البلد ..بس يا ترى عملنا ايه ؟؟ بصراحه مش فاكرة غير السرير ..و خخخخ

الجمعه ..اجازة بقى ..مغلق للتحسينات و بالليل ما كانش يوم لطيف اطلاقا ..طلاقا ..مطلقا ..هه ..و يا رب بقى نعرف ناخد مقاسات الشقه المعفرته دى..كان المفروض رسميا انه اخر يوم فى الاجازة بس الورق

السبت ..مكتب العمل قافل و مكن البنك الاهلى كله عطلان ..بس الحمد لله السينما شغاله و الامريكين لسه ما قفلش ..الجو كان ملبد بالغيوم ..و الايس كريم كان تمام ..بس الافندم شربه ميلك شيك ..و الفيلم كان لطيف و اندى ظريف ظريف و كوكب ال..مش عارفه ايه ..ثم روحنا و ماما غدتنا و بسرعه على الزمالك ..جزم ..بالوان الطيف ...هه..و بعدين رحنا السينما كلايت مش عارفه كام مرة و نمسس بوند ..يالله ..كام افيه جامد ..صحكنا عليهم بجد و غير كدا كان نفسى امشى من قبل الاستراحه من الملل ..الفيلم طوييييل ...و روحنا ..و توته توته خلصت الاجازة ..حلوة و لا ملتوته ؟؟